Hide Button

சேமி டிப்பிற் ஊழியக் கட்டுரைகள் கீழ்க்கண்ட மொழிகளில் உள்ளன:

English  |  中文  |  فارسی(Farsi)  |  हिन्दी(Hindi)

Português  |  ਪੰਜਾਬੀ(Punjabi)  |  Român

Русский  |  Español  |  தமிழ்(Tamil)  |  اردو(Urdu)

news

காங்கோ - துயரத்தின் மத்தியில் நம்பிக்கை

திங்கள் மாலை, ஜுன் 21, 2010 - காங்கோவின் வணிக மையமான பாயின்ட் நாயிரேயிலிருந்து அந்நாட்டின் தலைநகரமாகிய பிரேசா வில்லேவுக்குச் சென்ற ரயில் இயல்பான யாத்திரையாக ஆரம்பித்தது. அந்த நாளின் பிந்திய மாலையில் மக்கள் நிரம்பிவழிந்த அந்த ரயில்வண்டி வழக்கத்துக்கதிகமான வேகத்தில் சென்றதைச் சிலர் கவனித்திருக்கலாம். ஆனால், பின்னால் நடக்கப்போகிறதை யாரும் சொப்பனத்தில்கூட எண்ணியிருக்க முடியாது. பாயின்ட் நாயிரேயிலிருந்து ஏறக்குறைய நாற்பது மைல் தூரத்தில் ரயில் ஒரு வளைவைக் கடந்தபோது, அதில் நான்கு வண்டிகள் தடம்புரண்டு ஒரு மலைச்சந்துக்கு நேராகச் சென்றன.

மக்கள் அலறினார்கள், சரீரங்கள் ஒன்றோடொன்று மோதின. திகிலடைந்த பயணிகளோடு வண்டிகள் மலைச்சந்திலே விழுந்தபோது அங்கு குழப்பம் நிலவியது. இறுதியாக மயான அமைதி உண்டாயிற்று. அங்கு மரணமடைந்த ஏறக்குறைய நூறு பேருடைய நிரந்தர அமைதி அந்த நாட்டோடு சத்தமாய்ப் பேசினது. காயப்பட்ட 700 பேருக்கதிகமானோருடைய அலறுதல் பாயின்ட் நாயிரேயையே குலுக்கியது; தங்களுக்கு அருமையானவர்கள் பிழைத்தார்களா அல்லது மரித்தார்களா என்பதை அறிய பயணிகளின் குடும்பத்தார் ரயில் நிலையத்தில் கூடினர்.

தேசீய துக்கம் அனுசரிக்கும் தினங்களாக ஜுன் 26-28-ஐ அரசு அறிவித்தது. காங்கோ நாட்டின் சரித்திரத்தில் இது மிகப் பெரிய விபத்தாகும்.

வெள்ளி-ஞாயிறு, ஜுன், 25-27,2010 - பாயிண்ட் நாயிரேயிலுள்ள திருச்சபைகள் அனைத்தும் சேர்ந்து நடத்திய சுவிசேஷக் கூட்டங்களில் அகில உலக சுவிசேஷகராகிய சேமி டிப்பிற் செய்தி கொடுத்தார். அநேக மாதங்களுக்குமுன் இக்கூட்டங்கள் நடைபெறவேண்டியதாயிருந்தபோதிலும் டிப்பிற்றுடைய யாத்திரை வசதிக்காக இக்கூட்டங்களை ஆறு மாதங்களுக்குத் தள்ளிப்போடவேண்டியதாயிற்று. இந்தக் கூட்டங்கள் நடைபெற்ற நாட்கள் எவ்வளவு முக்கியமானவையென்பதை அதின் தலைவர்கள் ஊகித்திருக்கமாட்டார்கள்.

ரயில் விபத்தினிமித்தம் நாட்டிலே துக்கம் அனுசரிக்கப்பட்டது. தொலைக்காட்சி, வானோலி மற்றும் செய்தி ஊடகங்கள் டிப்பிற்றை அணுகி, துன்புற்ற அந்த மக்களுக்கு ஆறுதலான வார்த்தைகள் கூறும்படிக் கேட்டுக்கொண்டன. அவரும் விபத்தில் சிக்கிய மக்களுடைய குடும்பத்தாருக்கும் நண்பர்களுக்கும் ஆழ்ந்த அனுதாபத்தை அறிவித்துவிட்டு, அவர்களுக்காக அவர் ஜெபித்தார்.

துக்கதின் முதலாம் நாள் வெளிக்கூட்டமொன்றில் பாயிண்ட் நாயிரேயிலுள்ள ஆயிரக்கணக்கான மக்களுக்கு வாழ்க்கைப் புயல்களின் மத்தியில் எவ்வாறு நிலைநிற்பது என்பதைக்குறித்து டிப்பிற் பிரசங்கித்தார் மக்கள் கருத்தோடு செவிகொடுத்ததுமல்லாமல், நூற்றுக்கணக்கானோர் கிறிஸ்துவுக்குத் தங்கள் இருதயத்தை ஒப்புக்கொடுத்தார்கள். ஆலோசகர்கள் அவர்களோடு ஜெபித்து அவர்களுக்கு உதவிசெய்தார்கள்.

அங்கோலா நாட்டில் கடந்த சில ஆண்டுகளாக டிப்பிற் அநேக சுவிசேஷக் கூட்டங்கள் நடத்தியிருந்தபடியால், அங்குள்ள கிறிஸ்தவத் தலைவர்களுடைய அழைப்பினாலேயே அவர் காங்கோ வந்தார். அங்கோலாவில் நடைபெற்ற கூட்டங்களைக்குறித்துக் கேள்விப்பட்ட காங்கோ நாட்டுத் தலைவர்கள், தங்களுடைய நாட்டிலும் அத்தகைய கூட்டங்கள் நடத்துவதற்கு டிப்பிற்றை ஒழுங்குசெய்துதருமாறு அங்கோலாவிலுள்ளவர்களைக் கேட்டுக்கொண்டார்கள். இக்கூட்டங்களுக்குமுன் திருச்சபைகளை உருவாக்குவதைக்குறித்த கருத்தரங்கு ஒன்று நடத்தப்பட்டது. கிறிஸ்துவை ஏற்றுக்கொண்ட நூற்றுக்கணக்கான மக்களைக்கொண்டு புதிய திருச்சபைகளை உருவாக்கும் திட்டங்கள் தீட்டப்பட்டன.

அந்த மக்களுக்குக் கூடுதல் நம்பிக்கை தேவை. தேவன் நம்மைச் சரியான இடத்தில் சரியான சமயத்தில் சரியான செய்தியோடு கொண்டுவந்திருக்கிறார். தேவையான இடத்தில் முக்கியமான நேரத்தில் நான் வரத்தக்கதாக என்னுடைய கால அட்டவணையைத் தேவன் மாற்றியமைக்கிறதைக்குறித்து நான் எப்போதும் ஆச்சரியப்படுகிறதுண்டு. அதைத் தேவன் பாயிண்ட் நாயிரேயிலும் செய்தார். தங்களுடைய வாழ்க்கைப் புயல்களின் மத்தியில் மக்கள் நம்பிக்கையைக் கண்டுகொண்டார்கள் என்று டிப்பிற் சொன்னார்.